湯水食譜 - 沙參玉竹 中文字幕 Chinese Soup Recipe

今晚食乜餸？菜乾豬骨湯係老牌港式湯水之一，滋陰潤肺，雪耳含有大量胡蘿蔔素以及膳食纖維，促進腸胃蠕動，亦刺激皮膚新陳代謝。

有時喺屋企突然想煲滋潤湯水，又唔想落街買料，打開雪櫃或者都搵到啱用嘅食材。今日介紹嘅呢個菜乾雪耳豬骨湯，好多材料都可以買定，即刻同大家睇下！

首先睇睇材料：
雪耳 1球
菜乾 適量
沙參 適量
玉竹 適量
無花果 5-6粒
南北杏 適量
豬骨 300-500克
薑片 數片

正如之前講過，煲湯其實可以好隨意。之前買咗舊燒肉，豬骨無食雪咗入雪櫃，拎番出來啱啱好可以用來煲湯。當然，燒肉嘅骨多油，放落湯煲之前一定要飛一飛水，迫晒啲油出嚟。如果唔用豬骨，你亦可以選擇落瘦肉㗎！

雪耳要用室溫水先浸30分鐘左右，跟住用食物鉸剪先將底部較硬同黃嘅位剪走，跟住好似咁樣，剪番一朵一朵嘅雪耳花出來。

菜乾先用清水洗一洗，再浸30分鐘待用。沙參、玉竹都要用清水浸15-20分鐘。我通常會買定無花果乾，可以儲存比較長嘅時間，用之前浸幾個字就可以。

材料準備好之後就可以放落湯煲，記得加多幾片薑，之後落適量嘅水，用大火煲30分鐘之後再轉中細火煲多45分鐘，落少少鹽調味就飲得！

#湯水食譜 #沙參玉竹 #清熱潤肺